Timmisartumut ilaasartaammut ilaasut
Ukiup massuma qaammataasa siulliit pingasut ingerlanerani inuit 11.479-it timmisartumit angallanneqarsimapput, taamaallunilu siornamut naleqqiullugu angalasimasut 744-nik ikinnerullutik. Angalasut 90,5 pct.-ii Kangerlussuaq aqqusaarlugu angalapput tassalu inuit 10.393.
Timmisartukkut nunanut allanut ilaasut
Kisitsisaasivitsinnut kisitsisit nutaat ilanngupput, taakkunatigullu takuneqarsinnaalerpoq nunatsinnut takornarissat tikeraartartut nunanit suninngaaneersuunersut. Angalasut amerlanerit takornariartuupput nunatta avataani nunagisallit, 59 pct.-iullutik, nunaqqatigullu 41 pct.-inik agguataarlutik. Titartakkami ataaniittumi takornariat nunagisaat naatsorsoqqissaakkat takuneqarsinnaapput. Angalasut nunagisaq pillugu apersorneqartarput nunarput qimallugu aallaleraangata.
Titartagaq 1.
Timmisartukkut nunanut allanut ilaasut nunagisaat,
2015-imi qaammatit pingasut siulliit
Najoqqutaq: http://bank.stat.gl/TUNFLY
Kisitsisit timmisartunik attartukkanik ilaasartaatinillu ilaasut tunngavigalugit pissarsiarineqarput, Mittarfeqarfiit Visit Greenlandilu suleqatigalugit.
Ukioq 2014 naalernerani Naatsorsueqqissaartarfiup angalasut nunagisaat pillugit paasissutissalinnik saqqummiussivoq. Tassanilu paasissutissat aallaavigalugit nunat sorliit saqqummeqqassanersut allanngortissimallugit, taamaattumillu naatsorsuineq iluarsaanneqarsimalluni.
Unnuinermik naatsorsueqqissaarneq
Unnuinerit katillugit 42.700-usimapput. Tamanna ukiup siulianut saniliullugu 4.499-nik amerleriarnerulluni. Inuit piffissami uani katillugit 14.793-it unnuisimapput, taamaasillunilu 10,5 pct.-imik siornamiik amerlanerullutik. Agguaqatigiissillugu inuk ataaseq ullut 2,8 akunnittarfimmi unnuisarpoq.
Titartagaq 2: Akunnittarfinni unnuisut, Nunap immikkoortui tunngavigalugit
Najoqqutaq: http://bank.stat.gl/TUNHOT, *Ilulissat Qaasuitsumut ilanngunneqarpoq
Unnuinermik naatsorsueqqissaarneq unnuisarfiit aalajangersimasut 37-it suleqatigalugit qaammammut ataasiarlutik nalunaarsuisarnerannit tunngaveqarpoq.